阿占:拜仁食漢堡響頭炮

大家好！新球季又開始，德甲今晚正式揭幕，我阿占會繼續努力，貼多好畀各位。今日拜仁大戰漢堡，話晒都係新球季主場第一擊，主W得1.48倍係熱，但都應該幾穩陣。（有線61周六凌晨2:30直播）
雖然話漢堡今季冇中場主力雲達華治，但我就覺得對佢火力影響唔大，因為上季雲達華治受傷陣，漢堡已經由今季新任隊長查洛林踢進攻中場，攻擊力一樣保持到。加上今季改由前熱刺主帥祖爾執，睇熱身賽對住祖雲達斯同皇家馬德里都開大就知，球隊風格都係以攻代守居多。另方面，漢堡呢場雖有後防高柏尼踢完京奧趕及歸隊，但係呢位仁兄踢法都係粗枝大葉型，對住鋒力有番咁上下對手，仲一味鬥搶，真係好難唔失波。
另邊廂主隊拜仁今個暑假冇咩新聞，最大變動就係改由奇連士文掌帥。奇帥雖然年紀輕輕，不過以往任國家隊時，就睇見個個球員都肯為佢去搏，加上佢又鍾意進攻打法，相信今場揭幕戰，都係會以攻行先。無疑今場東尼、列貝利同沙洛等仍然有傷，但好在中場保路斯基同咸美艾天托普都可以復出，配合埋歐國盃大勇普多斯基，拜仁火力仍然keep得住。

拜仁射手熱身賽入波多

睇番近績，拜仁早排熱身賽入得波多之餘失波亦唔少，連德國盃夫添對住低組別艾福特都要失三球，好彩憑住普多斯基同高路斯等入波至能夠險勝。無他，鋒力強大就幾時都數，今場就算會失波，拜仁都應該可以入得更多，旗開得勝。