肥叔:高雲地利赫斯拍住上

周中賽事唔多，但近期巴甲吸引到唔少投注額，好似尋日朝早踢高士路對國際體育會咁，高士路賽前係咁落飛，由讓半球中水至高水，跌至六幾水都唔肯轉盤，結果高士路順利勝出，近期巴甲「蛇貨」都中到應一應，讀者投注前不妨多留意飛數變動。
今日英冠、英甲、蘇超同法甲都開鑼，但肥叔建議大家唔好太心急，全日咁多賽事，搵到真係心水先投注都未遲，畢竟季初變數極多，操盤手同球迷所預期，或者同最終結果有出入，但有兩場值得留意，分別係英冠高雲地利，同埋蘇超赫斯。

赫斯老細放權有前途

高雲地利上季搞到差降班，但卻係投注者恩物，每當冇人留意時候，「高地」就料，開鑼戰對住略有名氣諾域治，讓平半相信冇乜人敢要上盤，但呢隊波過往專呢場次出擊，玩上盤半個盤博一個盤相當超值。
蘇超赫斯亦係今季銀行隊，過往呢支球隊畀獨裁班主羅曼諾夫玩謝，上季成績亦慘不忍睹，但今季羅曼諾夫講明下放權力畀新領隊拉斯奧，以呢隊波財力同人腳，今季應可以踢番起，開鑼戰主場對馬瑟韋爾，讓平半上盤抵玩。