蘇豪:水手回勇踢到曉飛

周中踢完日聯盃八強戰，聽日立即有場翻版戲碼，橫濱水手主場再戰大阪飛腳，飛腳冇射手巴爾，鋒力銳減，反觀水手上賽以壓倒性姿態贏波，今次匆匆再戰，飛腳反先機會唔大，主隊可望再下一城！（周六下午6時30分開賽）
飛腳王牌射手巴爾離隊他投，土炮箭頭播戶龍二肝病復出無期，大軍突然鬧前鋒荒，搞到會方要周圍四出搵前鋒，上場賽前已經話想斟水手箭頭洛尼，不過現時仲未成事，今場會繼續起用盧卡斯同山崎雅人攻堅，但呢對組合火力有限，難寄厚望。

飛腳兩閘唔出得

日本國腳中場遠藤保仁上仗傷愈後備落場，有助提升飛腳組織力。不過左閘安田理大代表日本踢京奧，右閘加地亮又有傷在身，冇晒兩個出擊型守將，側擊力肯定大減。球隊上次對住水手雖然僅輸，但全場畀對手住砌，演出唔多對辦。
水手近十場聯賽不勝，搞到要護級，球員知恥近乎勇，上場以二比一擊敗飛腳，踢出近期代表作，三日後再戰，佢護級心切，實會同對手死過，食住個勢兼有地利，可以再贏一仗。