蘇豪:日聯盃三神追殺東京

日聯盃八強戰次回合今日黃昏開波，四場波首回合咬得好緊，次回合必有惡鬥。今次睇中大分三神，球隊首回合作客贏ＦＣ東京二比一，今場兩軍同樣有奧運腳離隊備戰京奧，但東京仲有一大棚傷兵，陣容殘上加殘難望反先，三神小讓平半，上盤有計！（周三下午６時開賽）
京奧舉行在即，日本奧運腳已歸隊作最後準備，三神門將西川周作同中場森重真人入選，東京中場重心尾山陽平及防線新星長友佑郁亦被徵召，兩軍實力同樣受削。相比之下，東京情況更壞，大軍傷兵滿營，中場大竹洋平及近藤祐介、守將小山泰志同般奴古亞度斯都係十字軍，呢一仗唔多齊腳。

鯨魚食過翻尋味

三神近期傷疲盡起，前鋒組合烏士利同前田俊介甚具威力，前線「雙高」高橋大輔同高松大樹可候命，加上日本國家隊新力量金崎夢生意外冇份入選奧運隊，大軍兵源尚算充裕。再者，三神目前為日職主場王，九戰七勝唔講得笑，首回合作客都贏東京，返到主場優勢更明顯，小讓平半捧得過。
同日名古屋鯨魚主場面對千葉市原，市原雖為盃賽專家，但於聯賽情況危殆，再唔救就死得，相信頭米勒唔敢玩，況且球隊首回合落後○比一，今仗作客反勝鯨魚難度甚高，估計主隊可以順利贏多場，主Ｗ穩陣！